وجدت الحل ..

طبعا من المشاهد الواضحه في عدن وخلال سبع سنوات مضت من سيطرة التحالف والشرعيه وبعدها سيطرة الانتقالي والامارات تبين بشكل واضح أن عدن تلك المدينة والموانئ والمطار والمصافي ومؤسسات الدوله والبنوك والثروه والمدنيه وبناء مجتمع مدني ودولة مؤسسات كل ذلك قد صار كلام فاضي..
يا جماعه لازم نتفهم الأوضاع لازم نتغير ونواكب المتغيرات الثوريه والخليجيه والدولية...حاليا المواطن في عدن يكلم نفسه يشتي راتب وخدمات ومؤسسات ونظام وتنميه ويريد رغيف ومياه وكهرباء..يكلم نفسه فقط..
لايوجد أحد يهتم لهذه القضايا والا كان حققوها ببساطه..
الذي حققوه هو فقط بناء جيوش وكتائب وكثير انخرطو مع الجيش والأمن والاحزمه..
التحالف بريدك تكون جندي معه ولا يريدك مواطن ودولة ومؤسسات وانهاض عدن وتنميه واعمار 
وكل هؤلاء المنخرطين بالجيش يتحصلون على رواتب سعوديه واماراتيه وشرعيه وانتقاليه 
كويس كل هذا ..
بقى كل الشعب الجنوبي مدنيين وعمال مهندسين اطباء اعلاميين صيادين وعمال الخدمات لا يستطيعون مواجهة اسعار المعيشه..
الحل بسيط جدا..
يتم تسجيل كل هؤلاء بالجيش والأمن والاحزمه ومحاربة الإرهاب والمقاومة في عدن والساحل الشرقي والغربي والجنوبي وينضمو مع التحالف ويصرفو لهم رواتب مثل القوات المسلحه
بعدها يطلقون على عدن ( وزارة الدفاع الجنوبيه ) 
يعني اي شخص بايدخل عدن يعتبر دخل مبنى وزارة الدفاع وليس عدن فهذا خلاص كان زمان شئ اسمه عدن 
وتكون هذه الجيوش في خدمة الثوره الجنوبيه تحت اشراف دولة التحالف منشان المملك سلمان أو محمد زايد أو رؤساء الشرعيه والانتقالي لما يقررو بصرف اكراميه أو رفع الرواتب يكون كل أهالى عدن من ضمن كشوفات الجيش وهنا سوف تتحسن كل معيشة الجنوب تحت مسمى وزارة الدفاع الجنوبيه
اعتقد هذه عداله وبعدين اي مهمه يشتيها التحالف يستدعي ماىة او مائتين  الف من وزارة الدفاع ويتوجهو الجبهات أو اي منطقه في العالم يشتيها التحالف حتى ايران أو القدس أو أوربا لمحاربة الإرهاب واي مهام ثوريه
وخلاص هنا نكون حلينا كل الاوضاع الاقتصادية للمواطن..
لأن بدون هذا سيظل الناس يصرخو ويكلمو أنفسهم نشتي راتب وخدمات ورغيف وعصيان ومظاهرات واحتجاجات كلها على الفاضي وبيموتو من الجوع لان لا احد يهتم لهذه القضايا..
انا اول واحد اسجل نفسي جندي مع الجنوب للعمل مع التحالف ..
على الراغبين التواصل معي لضمهم بكشوفات ( وزارة الدفاع الجنوبيه ) 
تنبيه.: اي واحد مازال يشتي عدن المدينه والجنوب المستقله والمؤسسات والموانى والاعمار والمدنيه يروح له مجلس الأمن يدور راتبه ومعيشته وروتي وطماط..
توكلنا على الله..
علي الهيج
جندي جنوبي في جيش التحالف