شوف عمي عوض بن مشعفل خرج اليوم من بيتهم عيونه حمر ووجهه مشقلب ويخاطف بيداته تقول يكلم ادمي وهو يمشي وحده مامعه مخلوق ، امانه اني قلت ان شي جن ركبته من صباح الصبح ولا انا داري يكلم نفسه في ايه وذلحين شوفه مسند جنب هاتاك الفنه ساعة يحك راسه وساعة يخطط في القاع وماشي بيطيعني الا لو هبيت له وفليته لما اخرج ذي في راسه هروج واعرف وش رابشنه وقالب شيفته اليوم..
يه يه سرحت له .. خلوني باجي من يمينه ولابيشوفني الا وقدني فوقه قيم لان عينه اليمنى ماتشوف سوى
_هاسلام عليك ياعم عوض
_وعليكم السلام ..ولاتجلس شع كبيدتي تحوش وبخرج غثاي اليوم كله فيك
_لا جلست وبقاك .. لكن ياوجه الله سم بالرحمن يابن مشعفل وقلي وش كاربنك ومغثي بك
_مغثي بي صحابك ذي مادخل لي عين من قفاهم وامسيت قبص عيوني والحاس يمص دمي من قفا الخمم
_منهم صحابي ذي طيروا النوم من عيونك لاسامحهم
_صحاب الكهارب ذي رجيتني بالمديح لهم وانهم شغالين وانهم وانهم وانا امسي في الغدرا والحاس يقطب كبيدتي وعاد قليلين الحيا ساقوا لي فاتورة كما وجهك يالخام قل عقولهم
_هاااه وانت ياعم عوض متى سددت فاتورة الكهرباء اخر مرة
_سددتها يوم جات عمتك صالحة من الحج
_حووووه عليك قد نسيت متى جات عمتي صالحة
_هاتشوف انك منافق ومجامل ومطبل ومحامي لهم ، ذلحين يفين مامطفي الكهرب الا فاتورة عوض مشعفل!!؟
_ياعم عوض صل على النبي لك سنة مادفعت ريال وناصر خوك له ستة شهور مادفع وحسين بن ناصر مايدفع وبن قدرية بنت حسين مايدفع وهل عيشة مايدفعون وعيال ال مجلبع مايدفعون و ذا مادفع وذاك مايدفع
هامنين تباهم يشترون ديزل للكهرباء
_يشترون من حق الحكومة
_ومنين تجيب الحكومة؟
_من البنك
ومنين يجي للبنك؟
_من الحكومة
_هاجني شلك.. قلنا لك الحكومة منين تجيب عدي للبنك والناس ماتدفع قيمة الكهرباء ذي يستهلكونها
عاد باتعقلون وتسددون قيمة الكهرباء عشان تشتغل لنا ولكم ولاتخربون عادكم علينا احنا اللي نسدد
شعوا ماشي باتقع كهرباء والفلوس ماشي
_يفين ايه
_يفين قم وتفرتش واسرح سدد فاتورتك وباتقع كهرباء وقل للخلق تسدد ولو سددت الخلق كلها انا ضمين لك في كهرباء من هذا الراس
_شعك تجيب مهرا
_قلنا اليوم قم تفرتش ولو شي نقص عليك تقنع شنطة عمتي صالحة شعها ماتخلى من العدي .. شعني شوفها تبيع كل يوم كبش
_اي انشهد ان عادها باعت امس كبش تقول ثور
_هاسرحنا
_سرحنا
#سدد_فاتورتك
#محمد_سالم_الأحمدي