آخر تحديث :الجمعة-29 مارس 2024-11:23ص

صفحات من تاريخ عدن


صفحات من تاريخ عدن.. جولة في ذكريات اهالي عدن

الثلاثاء - 14 يونيو 2022 - 10:14 ص بتوقيت عدن

صفحات من تاريخ عدن.. جولة في ذكريات اهالي عدن

عدن((عدن الغد)) خاص

هل غسلوك بالحناء والغسل بعد ولادتك ..وعملوا لك كحل ولبسوك الجبله البيضاء بنت كنت او ولد ..ودخلوك الهندول المربوط برجول القعاده الخشب بطراحه ولاقيت كم من دقه برأسك ..
هل خزقت لكِ الجده اذونك بابره وخيط وخلو الخيط باذنك اسبوع ..
وكانت خثان الولد عند الرئَيس يجي للبيت وبعده يوزع اللحم على الجيران يوم السابع حقك .
هل اجت الجده ترفع لك لما كنت تشترغ باللبن أو تمرخ لك المكحفه لما ولاتسكت من البكاء .
هل عملوا لك أجروا ورانا بالحافه وياجده قولي قبع قبع ووزعوا الساكت ونعنع ابوا العسل .
هل لعبت بالحافه من كبته طيار وسبع الصاد وبريلا بريلا .وفتاتير وشبدلوا. ومن لاقى صاحبه حنجل له 
هل تضاربت مع عيال الحافه ورحت اشتكيت ياخاله شوفي ابنك او بنتك ضربنا وخالتك تجي تضربكم الاثنين وامك تشجعها.
هل كانت جمله باابسبسك تخليك تختفي تحت الارض وتصبح تمثال بدون اي صوت او حركه.

هل  اكلت سكريم بالدوم ..  سكريم بالحمر .. و جنب باب المدرسة بطاط بالحمر من الدست حبتين مع قليل مرق بملعقه واحده انت وكل الحافه  .
هل درت بالحوافي معك  قصعة لبن فاضيه بيد واليد الثانية عصا وتخبط وتغني مرحب مرحب يارمضان .. والعيد أجانا مو اهبله.
ملسوك اهلك بسليط نارجيل عشان السلاخ ..وماانقدك من الحراره إلا البوتر الصيني..وأبو فاس والسليط الجلجل هو الصيدليه حق البيت ..ولازم لما تمرض تغطي اذونك.
هل عملوا لك فوله فلوس ونعنع وجمعوا جهال الحافه لما قطعت اللوز أو عملت الصبع الزائده. أو طلعت طياره لاول مره بحياتك .
هل لفيت على بيوت الجيران ياخاله امي تقول لكم اعطوها قليل بسباس احمر مطحون  المكينه حقنا حرقت أو اطحونا لنا البسباس ..أو اعطونا رأس بصل وحبه طماط .
هل كانت بيوت الحافه فقط تغلق بالباب الشبك الخشب أو بالهندراب ولما تدق ينتعوا الحبل ويفتح الباب .
اذا صار عرس بالحافه والرجال يتعاونوا بنصب المخدره وبنات الحافه يتجمعوا يقرطسوا النشره حق العرس نعنع البيض  وفوفل . وينظفوا البيت ..وفي بيت بالحافه معه اتنين كراسي وقطيفه جدار صغيره وكل عرس ومخدره هي الكوشه حق العرسان يتسلفوها منهم .وينطبخ الزربيان في المخدره والحافه كله تأكل زربيان وهلوى .
هل لو مات احد من الحافه ..تبعدوا البردات حق بيت الموت ..وأهل الحافه مايفتحوا التلفزيون ثلات ايام ..وبيت الموت مايطبخوا اكل يجيهم من بيوت الحافه والأهل والأصدقاء...ويوم التسع يوزعوا قهوه ستنا خديجه وحلاوه هريسه وروتي وتمر وقت الجنازه .
هل لما سافر واحد من البيت ..ماتكنسوا الأرض ثلات ايام علشان المسافر حقكم يرجع .
هل تزورا المريض ومعكم قاروره فيمتو وقصعتين عنانيص .
معك عرس..سفر .دخلت هكبه وكان الوعد حقك الاول لانك محتاج ظروري والهكابه قدرت ظرفك المستعجل ...والهكبه التانيه بتخليك الأخير.
رحتوا رحلة من الصباح للبحر وشليتوا باص معاكم اكلكم وشربكم والطبل والمراويس وفلان لازم يجي معانا ماتحلى الرحلة الا فيبه..    وقبل كل رحلة في صياح وبعد كل رحلة في حاجات ضايعة .
هل مسكت طابور من الفجر جنب المؤسسه علشان الراشن ..أو عند سوق الخضره ومعك زنبيل ويكعفوك البدنجان غصب .
هل كان بيتك وكل الحافه نفس نوع الستائر حق المؤسسه.
هل في رمضان البراتن من بيت لبيت وياخاله تقول امي هذا الصحن مش حقنا الي جبنا لكم به العواف.
هل طلعت بالباص من المعلا للخور ونزلت محطه عيشه .
هل رحت البجيشه بالعيد أو زياره الهاشمي خامس العيد .
هل لما تفتجع يطزوك بالسيجاره برقبتك أو يطفشوك بماء بارد ..ولازم تشهق علشان تخرج الفجعه..واذا ماشهقت يعيدوا الطزه .ولازم تشرب قطر الحديد علشان مايجي لك صفار من الفجعه.
هل قاروره الجام ترجع قلص ..وجرم ابوك ممسحه للأرض أو ممسكه الدسوت ..ومعكم مشط القمل وخوزرانه وكوشه رطبه من أساسيات البيت.
وهل ..وهل ..
إذا..انت عدني 
العدنيه..د.انهار فيصل