خالد المعقلة

الحقيقة ماانتبهت للرجال لما مر بجنبي وقبل مايعدي من امامي قال ادبج وارتشخ على الارض فاقدا للوعي..
طبعا اربكنا هذا اللي حصل وقفت اصيح يامحمد فتحي يارائد ياشباب تعالوا احملوا الرجال دوخ ..

حضر الشباب واحد رشه بالماء وآخر يحاول يصحيه وانا اصيح هاتوا له سيارة ودوه المجمع لعاد يكون قندل..

شوية وجابوا سيارة من ركن الحافة انجيز وقلت لهم : هيا طلعوه ودوه المجمع حق الشيخ حمله محمد فتحي ورائد وآخرين للسيارة ..

صاحب السيارة قال : من بايجي معه الاسبطان؟؟ 
ولا احد تحرك قفز المعقلة ابراهيم الرديني وقال : روح معاهم انت ياخالد قدك تعرف اصحاب المجمع ..

كبدنا هذا المصيبة واستحيت اتراجع فانا عمدة الحافة حملت عصاتي وركبت قدام واثناء سيرنا للمجمع قال الدريول : اليوم سبت اجازة ياعاقل ذكرت وقشببت من الموقف ذالحين كيف اسوي بهذا المدوخ الحوشة ؟؟

لفت للكرسي الخلفي شفته ممدد يشخر قلت في نفسي وقعت يامستر عويضان ..
قلت للدريول وانا اتحسس العشرة الف ريال حق الكهرباء : هيا اعصر وودينا مستوصف الحصيني..

دخلنا المستوصف وحملوه بنقالة للطوارىء وجاء الطبيب وكشف عليه وكتب له فحوصات مسكت الورقة ورحت للحسابات اسأل عن التكلفة قالوا لي : ٧٥٠٠ ريال وباقي له دريبات وادوية ودبة اوكسجين ..

رجعت اجري للطبيب وقلت له : شوف ياابني معك عمك خالد شمسان اكبر فضولي ومعقلة في عدن وقد وقعت بهذا المدوخ وقلت باافعل خير والان مامعي الا عشرة الف ريال ياابني حق الكهرباء ولا معي فلس زيادة انت عالجه وصلحه وقيمه استاد بالعشرة الف ريال وخلينا انا اروح لي..

ضحك التختر وقال : ياحاج ايش انا اجنير اصلحه بعشرة الف ريال .. هذا مريض واللي يحتاجه بانعطيه..

قلت له : اسمع شل العشرة والمريض والاجر لك وانا بااروح لا تدخلنا متاهات ووقفت.. 
قال : اجلس طيب بااشوف حالته قد يكون صحى ..

رحنا الى غرفة الطوارىء وجدنا الرجال بدأ يتنفس ويفتح عيونه..
قلت : الحمدلله طلعت سليمه هيا روحنا ..
قال الطبيب : اصبر ياحاج نشتي نتأكد من انه استرد وعيه قلت له : مالك..قده قدامك صاحي وقلت للمريض المدوخ قم كيه امشي .. 
قام بتثاقل ووقف مسنود على كتفي .. 
قلت للدريول : شله الى فوق السيارة وهذا الف ريال اشتري له بسكت وعصائر الرجال دوخ من الجوع والجماعة هنا يشتوا يفترسونا الان بااحاسب وبااجي ..

قال الطبيب : طيب ماركبنا له الدريب قلت له : لو احتجنا دريب بانجي لك المهم دفعت ثمانية الف ريال وخرجت ..

وركبت السيارة والمدوخ في الكرسي الخلفي يأكل بسكت ويشرب والسائق ايضا يأكل بسكت ويشرب عصير وانا قلبي يعصرنا على تعبي وفلوس الكهرباء التي طارت في لحظة ..

تحركت السيارة وفي الطريق قال الدريول : الى فين ذالحين ياحاج ؟ 
قلت له : كيف الى فين ؟ من حيث ماشليتنا رجعنا ولفت للمدوخ وقلت له : كيف حالك الان ؟  قال : الله يسترك ويجزيك خير على مافعلته..

نفسيا ارتحت ونسيت الفلوس حق الكهرباء اللي طارت وصلنا ركن الحافة واستقبلنا محمد فتحي ورائد والشباب يرحبون بقدوم العمدة ونزل المدوخ وقلت لهم : هاتوا له كرسي يرتاح جنبي ..

اجى الدريول قال : حاسبنا معي شغل قلت له : مش انت الا فاعل خير زي ؟؟ قال : انا طالب الله على جهالي هات حسابي خلينا امشي..مديت له بالالف الريال الباقي وهذا اعتجن..
وقال : ايش ذا ؟
من الصبح انجيز معك وتعطينا الف ريال..
قلت له : ومعك عصير وبسكت وبعدين قد هي عشرة الف ريال حق الكهرباء طارت ولا معي غيرها ..
قال : مايخارحنا ..

تدخل محمد فتحي وقال له : العاقل فعل خير بهذا الرجل المسكين وانت اعتبر نفسك ساهمت معه..
قال : سيب الاجر له وجيبوا الأجرة حقي..

في الاخير اعطاه محمد فتحي الف ريال وقال له : هذا الف ريال من عندي زيادة خلاص اتكل على الله ..اخدها ولفت الى عندي وقال : لما تكون معقلة وعلى قولتك تدور الاجر كون ادفع الاجرة ومشى زعلان.

قليل الا وجاب الحاج سلطان صاحب مخبازة اضواء اليمن في حافتنا خبز رطب وحلبه ومرق للمدوخ  اكل لما صحى واعطوه الف ريال وودعناه وغادر الحافة يمشي تقول جندي في الحزام الامني استلم للتو المائتين الف سعودي الاكرامية حق عيدروس ..

اما انا طلعت واول ماشافتنا الحجة قالت : سلمت البيل حق التربك صحت قد نحنا طول الشهر طافي اربع ايام ولاصي يوم عادك تشتينا اسلم البيل بس سكهي لك..

ودخلت الغرفة وطبقت ورقدت..!!